លោកស្រី Angelina Jolie ចង់ពង្រឹងគុណភាព និងពង្រីកសក្តានុពលភាពយន្តកម្ពុជា
07-December-2015 | ដោយ មួយឡា
លោកស្រី Angelina Jolie-Pitt បានបង្ហាញក្តីសង្ឃឹមថា លោកស្រីអាចធ្វើការងាររួមគ្នាជាមួយសមិទ្ធិករភាពយន្តកម្ពុជា ដើម្បីអភិវឌ្ឍវិស័យភាពយន្តនៅកម្ពុជា។ លោកស្រី បានកត់សម្គាល់ឃើញថា សមិទ្ធិករភាពយន្តកម្ពុជាបច្ចុប្បន្នមានសមត្ថភាពខ្លាំង ដែលអាចពង្រឹងគុណភាព និងពង្រីកសក្តានុពលភាពយន្តកម្ពុជាបាននៅថ្ងៃអនាគត។
លោកស្រី Angelina Jolie-Pitt បានបង្ហាញក្តីសង្ឃឹម និងជឿជាក់ថា លោកស្រី នឹងអាចធ្វើការងាររួមគ្នា ជាមួយសមិទ្ធិករភាពយន្តកម្ពុជា ដើម្បីចូលរួមចំណែកក្នុងការអភិវឌ្ឍវិស័យភាពយន្តនៅកម្ពុជា។ នៅក្នុងកិច្ចកម្មវិធីកិច្ចសន្ទនារវាង លោក ប៉ាន់ រិទ្ធី និងសមិទ្ធិករភាពយន្តជំនាន់ក្រោយនៅសាលសន្និសីទចតុមុខ កាលពីល្ងាចថ្ងៃទី៥ ខែធ្នូ លោកស្រី Jolie-Pitt បានបញ្ជាក់យ៉ាងដូច្នេះថា៖«ខ្ញុំសង្ឃឹមថា ខ្ញុំនឹងអាចធ្វើការរួមគ្នាជាមួយសមិទ្ធិករភាពយន្តកម្ពុជា ដើម្បីអភិវឌ្ឍន៍ឧស្សាហកម្មភាពយន្តនៅក្នុងប្រទេសដែលខ្ញុំស្រឡាញ់ មួយនេះ»។
ក្នុងនាមជាវាគ្មិនមួយរូបនៅក្នុងកិច្ចសន្ទនារយៈពេលមួយម៉ោងនេះ តារាហូលីវូដ និងអ្នកដឹកនាំរឿងរូបនេះ ក៏បានគូសបញ្ជាក់ដែរថា វិស័យភាពយន្តនៅកម្ពុជាមានការផ្លាស់ប្តូរ និងរីកចម្រើនគួរឲ្យកត់សម្គាល់ បើធៀបនឹងគ្រាដែលលោកស្រីមកថតភាពយន្តរឿង« Tomb Raider»ជាលើកដំបូងនៅកម្ពុជា កាលពីអំឡុងឆ្នាំ២០០០ ។
លោកស្រីបានលើកឡើងពីការកត់សម្គាល់ជាក់ស្តែងចំពោះក្រុមការងារកម្ពុជា ដែលកំពុងចូលរួមផលិតភាពយន្តជាមួយលោកស្រី នៅក្នុងខេត្តសៀមរាបថា៖ «ពួកគាត់មានសមត្ថភាព មានជំនាញ ឆ្លាត និងពូកែ។ ពួកគាត់អាចធ្វើការងារបានល្អ ដោយមិនចាំបាច់មានផលិតករពីអឺរ៉ុបមកណែនាំ ឬបង្រៀនដូចពីមុននោះទេ»។ សក្តានុពលទាំងអស់នេះហើយ ដែលលោកស្រី សង្ឃឹមថា វិស័យភាពយន្តនៅកម្ពុជានឹងរីកចម្រើននៅថ្ងៃអនាគត។
សូមបញ្ជាក់ថា លោកស្រី Angelina Jolie-Pitt កំពុងថតខ្សែភាពយន្ត «ដំបូងខ្មែរក្រហម សម្លាប់ឪពុកខ្ញុំ» ឬ «First they killed my father» នៅក្នុងខេត្តសៀមរាប។ ភាពយន្តនេះ បានផ្តល់ការងារដល់ពលរដ្ឋខ្មែរប្រមាណ១ពាន់នាក់ តាមរយៈការចូលរួមសម្ដែង និងក្នុងតំណែងផ្សេងៗក្នុងដំណើរការថត។ បើតាមប្រធានគណៈកម្មការមហោស្រពភាពយន្តអន្តរជាតិកម្ពុជារូបនេះ ខ្សែភាពយន្ត «ដំបូងខ្មែរក្រហម សម្លាប់ឪពុកខ្ញុំ» មិនមែននិយាយអំពីសង្គ្រាមទេ តែជាភាពយន្តដែលនិយាយពីការតស៊ូរបស់ប្រជាជនកម្ពុជា៕
ប្រភព៖ thmeythmey
ចំនួនអ្នកទស្សនា
- ថ្ងៃនេះ911
- ម្សិលមិញ12561
- សប្តាហ៍នេះ28861
- ខែនេះ50741
- ឆ្នាំនេះ50741
- សរុប20493197